kaso ñemombe`u

Karai Toño

Karai Antonio niko karai katupyry ha imarangatuva`ekue, tamombe`umina pee͂me mba`épa ojehu chupe petei͂ árape ha`e che taitava`ekue omanóma niko.

Ha`e ose͂miva`era͂ hógagui henda kavaju moroti͂ ári ha oje`ói mombyry mombyry oho truko ra`a͂vo

Upéicha che taita oikoha rupi petei͂ ára oipykúi oúvo hóga rapére, oike omombyky hag͂ua hóga rape petei͂ pikádare , iñupytu͂va`ekue upe pyharépe omombyte rupi pe ka`aguy  hymba kavaju alazan oñepyru͂ iñangekói. Upépe ha`e oñepy`amongeta mba`érepa hymba oñemondýi ha`éko ndokyhyjéi voi mba`evégui imboka pora͂ upéro͂ petei͂ treintaiocho lutre moroti͂ petei͂ kaño dekogotádo overa hendýva umi oteretetéva rehegua, itavya vodokeicha ndojavýva voi, ha avei petei͂ tejuruguái juguaha, ha`e karai ojeroviava`ekue ijehe.

Upéi oho ohove pe ka`guýre inupytu rasa upemaroguare, jey jey kavaju ikuambu oñemondý ha osarakutea ápe ha pegotyo ha`ete voi ojevyséva upe tapégui. Peichahágu ho`áma katu kavaju ha che taita hi`ári opo opu`a͂ tuicha py`anýire oikuaase mba`épa oiko, oguenohe petei mohendyha ha ohesape vai vai henda kavajúre ha ojuhu oñeñapytimbaite petei͂ ysypópe upévagui ndikatui opu`a͂, neipamíro͂ oñemondýi ohendúre oñe`e͂va ichupe.

Oporandu taita.

-           Máva piko nde, ndaipóri ñembohovái oñemokiriri͂ete upépe oñeha`a͂ ojorávo henda kavaju, ha ojorávo ose͂ ñanihápe pe kavaju ha`etevoi ombokuaséva yvy okañy hag͂ua.

Upéi ohomirente yvyrupi ohendu oñe`e͂jeýva ichupe, ha`e ndohechái avavépe, oguenohe͂jey mohendyha ha ohesapévo ohecha petei͂ ava ra`anga ijao tahachíva; tuicha oñemondýi, upépe ipy`amano ha`e ho`a yvýpe.

Are rire opáy oñandývo ohoha aína tapicha ati`y ári, og͂uahe͂ petei͂ tendápe omboguejy ichupe ha oñe`e͂vo pe tahachi he`i:

-           Ikatúnepa eñembo`emi che rehe, che niko máro͂ ndikatuiva apytu`u ha aikoteve͂ py`a guapy aha hag͂ua ko yvy ape árigui.

Ha upéicha okañy hesa renondégui pe tapicha, ha ohechakuaa upépe oñembojamaha ohóvo ko`e͂ti͂ omyesaka͂va hóga rape.

Rireminte og͂uahe͂vo itapýime omombe`u oikova`ekue hese hogayguakuérape. Oñembyatyjoa hikuái ambue tapichakuéra ndive ha oho upe tenda ojehechaukahaguépe pe tapicha, ogueraha petei͂ kurusu ha oñembo`e pe karia`ýre ikatu hag͂uiaicha ojuhu py`aguapy, heta rire oñemombe`u yma ndaje ojejuka hague upépe petei͂ karia`ymi ose͂ramova`ekue mbokarógagui.

Ohai: Gustavo González