Ava Guarani Reko
Heta árama ñahendu ha ñamoñe`ẽ ava guaranikuéra rekovére, opa mba`e ñahendu ha jaikuaa tembiasakuégui. Ko`ág̃a tembiapo apógui jahechakuaa tuicha iñambueha tapicha ava guaraní rekovekuéra ymaveguarégui.
He`iháicha ava guaranikuéra, maymavarei ava morotĩ oguereko chupekuéra toryjárõ he`i hikuái, ha upéicha ñahendu “kachike péva, kachike amóva” pukarãrõ ojereko. Tuicha jajavy ko`ã mba`e ndajaikuaáire mba`épa he`ise.
Ñe`ẽ Cacique ojapóma 500 (posa) ary ojepuru hague, ymave oje`eva`ekue “Che Ru” – Ñande Ruvicha he`ise upe ñe`ẽ. “Cacique” ha`e peteĩ tapicha ha`evéva peteĩ atyhápe. Ojeiporavo hag̃ua ojehechakuaava`erã tapicháre imba`ekuaa, ijeroviapy, ha katupyry ikatu hag̃ua osãimbyhy ava aty, ndaha`éi ijaereínteva ojapyhýva ogueroguata hag͂ua tapicha aty, ohehechaukava`era͂ ikatuha osa͂imbyhy mba`ekuaapópe ha ikatu hag͂ua avei oi͂ jerovia hese ambue avakuéra. Ipoguýpe heta mba`e oguereko, ohehava`era͂ opa mba`e mba`éichapa ogueroguatáta pe aty oi͂ hag͂uame tekombo`e ha poyhu ojoapytépe.
Sapy`ánte oi͂ramo apañuái upe atýpe Cacique ohechava`era͂ mba`éichapa oñemyatyro͂ umi mba`e ikatúramo ose͂ pora͂va`era͂ anítei oikovai avave ndive.
Jaikuaaháicha tuicha iñambue tapichakuéra rekove, ymave oikomiva`erã hikuái umi ka`aguy tuichávape, upépe noikotevẽi mba`evéichagua hi`upyrã oguerekopava`ekue ka`aguy jerére. Ág̃a rupi jahecha oparupi ava guaranikuéra oikundaha ohekávo peteĩ tenda ikatumívo oñemopyenda ha márõ noñeme`ẽi chupekuéra. Ha añeporandu, mba`ére piko oikova`erã hikuái ojerure hi`upyrã tavaháre. Ndapéichava`erãmo`ã noñeguenohẽi rire chuguikuéra ka`aguyeta oikohaguépe ava guaraníva oikotevẽ`ỹme mba`eve hikuái.
Oje`ehaguéichama yvateve ymave noikotevẽi ojeporeka okaháre hi`upyrã, ko`ág̃a iñambuéma osẽva`erã okaháre ojeporeka opaichagua tekotevẽmby. Ko`ã mba`e rupi tapichakuéra ndoguerekói peteĩ tekombo`e mba`éichapa ohembi`uapova`erã, heta jey ho`u hikuái mandi`o mimói, térã ombochyryry vaka ñandýpe ha upéicha okaru. Heta ára ndoguerekói mba`eve oñemindu`umi hag̃ua ha avei oĩ ára peteĩ jaýnte okaru ha ohupytymívante.
Heta mba`ére avei sa`i imba`ekuaa ñemitýgui. Oikotevẽ hikuái tekombo`e oñemitykuaa hag̃ua ikatu hag̃uáicha osẽ tenonde gotyo, ha avei ohepyme`ẽ opaichagua ñemityngue hikuái voi oñeha`ãva`ekue oguereko.
Teta͂ sa͂mbyhyhárakuéra ohechava`era͂ oipytyvo͂ve ko`a tapichakuéra ikatu hag͂ua oike ñande apytépe, anítei oñemboykeve ichupekuéra, hikuái niko ndaha`éi mymba ñandeichagua niko avei, oikoteve͂nte pytyvo͂ ose͂ hag͂ua tenonde gotyo avei. Ko`a͂ mba`e ojehupyty hag͂ua oñeikoteve͂ tekombo`e rehe, péva`y͂re ndikatumo`a͂i oñese͂ tenondépe.
Ohai: Gustavo González
No hay comentarios:
Publicar un comentario